Bakı-Qazax yolunda ağır avtobus qəzası: 23 nəfər xəsarət aldı

Bakı-Qazax yolunda yol-nəqliyyat hadisəsi olub.

“Qafqazinfo” xəbər verir ki, qəza avtobusun aşması nəticəsində baş verib.

Hadisə zamanı 2 nəfərin öldüyü, 5 nəfərin yaralandığı bildirilir.

Qəza yerinə DYP əməkdaşları cəlb olunub, araşdırma aparılır.

Bakı-Qazax yolunda baş verən qəza ilə bağlı TƏBİB-in tabeliyindəki Bakı Şəhəri Təcili və Təxirəsalınmaz Tibbi Yardım Stansiyasının 10 həkim briqadası hadisə yerinə cəlb edilib.

Bununla bağlı TƏBİB məlumat yayıb.

Hadisə nəticəsində xəsarət alan 23 nəfər (19-u qadın, 4-ü kişi olmaqla) həkim briqadaları tərəfindən tibb müəssisələrinə təxliyə edilib.

Xəsarət alanlara zəruri tibbi xidmətlər göstərilib. Onların müvafiq şöbələrdə müalicələrinə davam edilir.

Qeyd edək ki, xəsarət alanlara əsasən, bədənin küt travması, döş qəfəsinin küt travması, başın ənsə nahiyəsinin əzilməsi, sağ çiynin əzilməsi, sol ayağın küt travması və s. diaqnozlar qoyulub.

Onların vəziyyətləri ilə bağlı əlavə məlumat veriləcək.